طلبات الرجال من الألف إلى الياء

زائر

أ: أنا فايت نام ساعة زمن، فيقيني ها أوعى ما تفيقيني وشعليلي الحمام بدي أتحمم قبل ما أطلع
أ: أيه مو على راسي بتأمر أمر حبيبي

ب: بتعرفي أني ما بطيق المقالي، ما حللك تتعلمي يعني، مرة تانية ما بدي شم ريحتها بالبيت
ب: بس أنا بحب المقالي؟ على كل متل ما بدك تقبرني ما عاد أعملها

ت: تعي لهون يا مرا، شو ليش مانك غاسلة القميص الأزرق يلي حطيتو مبارح بالغسيل
ت: تعدمني اذا شفتو، وين حاطو؟ مانو بسلة الغسيل؟ أه معلقو بالخزانة!! ايه تكرم عينك هلئ بغسلو

ث: ثواني وبيكون الأكل جاهز!!!! ايه صرلي ساعة ناطر لك لو كان خاروف محشي كان استوا
ث: ثانيتين وبيكون الأكل ع الطاولة تقبرني، بس أنت جاية قبل بساعة مشان هيك

ج: جلي هالجليات وخلصيني بقا، منظر المجلى بيغط عالقلب
ج: جاية جاية تقبرني كنت عم نيم الولاد تشكل آسي

ح: حاجتك طق حنك على التلفون، لعمى أنتو بتطقوا حنك وأنا بدفع
ح: حبيبي بتعرف أنو أمي عملت عملية وأنا هون بالغربة بقا بس كنت عم أتطمن عليها

خ: خيلتيني وأنت رايحة جاية عم تمسحي الغبرة، حبكت معك النضافة هلئ
خ: خلص يالله خلصت عيوني، بين ما اجيت من الشغل وطبخت وعلمت الولاد ونيمتون ما لحقت نضف البيت غير هلئ

د: دايما بتأخرينا عن المواعيد، خفيها بقا خلينا نلحق نوصل على بيت أهلي بهالعجقة
د: دوبني خلصت كوي بنطلوناتك وقمصانك، لحظة صغيرة وبكون جاهزة

ذ: ذكريني جيب هدية لأختي بكرا عيد زواجها، ما تنسي ها،، شو رأيك جبلها ذهب ولا شي للبيت
ذ: ذهب بيبين أكتر وأختك بتستاهل دخيل عينا مع أنو ما جابتلنا شي على عيد زواجنا

ر: رايح أسهر مع رفقاتي تبع أيام العزوبية الليلة، لا تنسي تحفري الكوسا الليلة مشتهي الكوسا محشي
ر: روح تقبرني، اسهر وانبسط وأنا بحفر الكوسا وبطبق الأكلة لغدا بكرا ايه مو تكرم عيونك

ز: زكاتك ناوليني هالشرشف من عندك بردت ومالي مروة قوم جيبو
ز: زينا ماما، الله يرضى عليكي ناوليني الشرشف من جوا، البابا بردان وأنا الكريب رح يهد حيلي مو قدرانة اتلحلح

س: سمعانة بشي اسمو ضغط؟ هاد بيجي من الملح الكتير بالأكل! ليش مكترة ملح شو بدك تجبيلي الضغط أنتي
س: سوري تقبر قلبي بس أنت هديك المرة قلتلي أنو الدكتور قلك تاكل شوية ملح لأنو ضغطك واطي

ش: شو هاللبس يلي لابستيه، لتكوني مفكرة حالك بنت 16 سنة، صرتي ستة وتلاتين خانم قومي انضبي وغيريلي هاللبس
ش: شو نسيت تقبرني أنك أنت اشترتلي هالفستان مشان ألبسلك ياه ليلة عيد زواجنا، وهي ليلة عيد زواجنا بس رح غيرو ولا يهمك يا عمري

ص: صاير مخك تخين كتير، شو ما حلك تفهمي أني بحب لاقي فنجان القهوة جاهز بس فيق من النوم
ص: صح تقبرني، بس مو مبارح قلتلي أنو القهوة الكتير عم تعصبك وما عاد بدك تشرب قهوة من هلئ ورايح؟

ض: ضليتي تزني فوق راسي لنجيب بلاي ستيشن للولاد، شرفي ما عادوا اتكنسوا من قداما
ض: ضحاك بعبك يا رجال، ولادنا لا بيروحوا ولا بيجوا أقل منا يتسلوا بشي بهالعطلة الصيفية

ط: طول ما أنت عم تنقي عليي لصلح الحنفية يلي عمتنقط، ما رح صلحها لتتعلمي تبطلي نق
ط: طول بالك يا رجال الله يخليلي ياك، خلص بكرا بنزل أنا بشتريلا جلدة جديدة وبغيرا

ظ: ظبتيلي حالك اليوم متل العالم عالسهرة، ما بدي تنكشيلي شعرك وتلبسي لبس مبهدل، هدول الناس يلي بدنا نسهر معون شغل رفع بقا لا تخجليني قدامون
ظ: ظالمني كتير حبيبي، ليش في شي مرة شفتني طالعة مبهدلة من البيت تقبرني، ولوو على طول رافعتلك راسك انشالله

ع: عانن على بالي المشاوي، قومي نزلي المنقل من عالسقيفة مشان تشويلنا بكرا
ع: على عيني حبيبي وأحلى أكلة مشاوي لعيونك.

غ: غسلتيلي جوز الجرابات يلي لحشتو قبل الضهر بالغسيل
غ: غسلتو تقبرني وغسلتلك قمصانك الداخلية وكويتها كمان

ف: فوتي جيبيلي شي شغلة حلوة أكلها، جاي عبالي الحلو
ف: في عنا كيك وفي كاتو على شوكولا، رح جبلك قطعة هيك وقطعة هيك ريتو مطرح ما يسري يمري

ق: قلتلك بترجعي ع البيت بعد شغلك بتحضريلي الغدا بعدين بتروحي عند أمك
ق: قلت لحالي بيت أهلي بلزق شغلي بمرق بشق عالماما بعد الشغل نص ساعة زمان بعدين بيجي عالبيت لأختصر الوقت، بس متل ما بدك تقبرني هلئ بجي بغديك بالأول بعدين بروح بشق ع الماما

ك: كمل النقل بالزعرور، مو ناقص غير تقليلي قوم ضب الأكل كمان
ك: كنت عم أمزح معك حبيبي، هلئ بس خلص الكويات بقوم بضب الأكل

ل: ليش لمبة البراد محروقة؟ أكيد نسيانه الباب مفتوح لحتى احترقت اللمبة
ل: لا والله تقبرني بس البراد صرلو عنا سبع سنين وهيك شغلات بتصير ولا يهمك أنا بصلحها

م: ما تنسي تروحي عند أمي بكرا وتاخدي الولاد، طلبت تشوفون لأنا مشتاقتلون
م: معقول أنسى روحي ما أمك متل أمي الله لا يحرمني منا

ن: نيمي الولاد وتعي بعدين جبيلي طشت مي فيه شوية ملح خليني انقع رجليي لارتاح من تعب النهار
ن: ناموا ماما ناموا، انا نعسانة أكتر منكون بس بدي روح أفركلو اجريه لأبوكون تعبان خطي طول نهار

هـ: هلئ بطلتي تعرفي تطبخيلنا كبة بلبنية ما قلتلك من كم يوم أني مشتهيا كتير
هـ: هو كنت بدي أطبخلك ياها اليوم تقبرني بس رحت جبت الولاد من المدرسة لأنو الأوتوكار كان معطل

و: وين فرشاية السنان تبعي، يا مراااااااا، وين حطيتيلي فرشاية السناااااااااان
و: وحياتك ما دقرتا يا رجال، ها ليكا ورا فرشاية الحلاقة تبعك محل ما أنت حطيتا الصبح تقبرني

ي: يا مرااااااااااااااااااااااا ااااااااااااااااااااااااا اااااااااا طبخيلي، غسليلي، كويلي، ضبيلي، رتبيلي، جبيلي، عطيني، جهزيلي، ناوليني، ساويلي، عمليلي، خديلي، وين ال------، ليش ال------- الخخخخخخخخخ
ي: يبعتلا حمى هديك الساعة،، قال اتجوزنا لنتستت قال، الله ياخدني ليريحني منك

لا أنت أكيد ما عم تحكي عن زلمي أو إنسان لأنو هاد دب مش إنسان بس والله أنو ما كل الرجال هيك
العمى أنت ع هاي الحالي ما بدك تتزوجي أبدا بس نصيحة مني أنو تقرأي كتب أحلا من هيك أو قصص عن الحب من شان تفتح نفسك أنو تتزوجي وما تخافي لكن الزواج سترى بس للرجل الصالح أتمنى أنو يجيك ابن الحلال يارب وما يكون هيك
ويحطك ع رف متل مابيقولو

زائر

لا أنت أكيد ما عم تحكي عن زلمي أو إنسان لأنو هاد دب مش إنسان

هههههههههه يخرب بيت شيطانك فقعتني ضحك يعني انا كنت بدي قولها بس استحيت
بشكر مرورك

يا عمي ليش هاي الحرب النفسية علينا

لا هاي مش حرب نفسية علينا شوبك أنت أكيد ماعرفت أنو زين ما بتحب الدبب ول هيك هي كتبت أنو هوي ع شكل إنسان من شان ما يزعل شي دب ويروح أكلها ويحرمنا منها ومن مواضيعها هاي هون قمت الذكاء