حوارات يومية من وحي حياتنا الانبطاحية

زائر

سعد : إيمتى بدنا نصير يا زلمة

شوقي : الله كريم
سعد : و نعم بالله ما اختلفنا ، بس شو مشان وضعنا يعني
شوقي : ليش شبو وضعنا يا معلم ، الحمدلله على كل حال
سعد : أخي الحمدلله على كل حال صح ، بس يا أخي ... يعني .... والله ما بعرف شو بدي احكي
شوقي : احكي خيو احكي
سعد : يعني أخي شغل و عم نشتغل متل الحمير و دراسة و عم ناكل هوا و ندرس ، بس و آخرتها ؟
شوقي : لك يا أبو سعود كلو هاد بتلاقيه بعدين
سعد : إيمتى بعدين يعني !!!؟ بس يصير عمري خمسين سنة ؟
شوقي : حبيب ما بتعرف ، الدنية حظوظ ، بيجوز السنة الجاية تشنّص معك و بيجوز تموت قبل ما تشنّص
سعد : تقبر حالك شو فهمان ، يعني صارت كل الشغلة هلق حظوظ ؟ و بركي ما إجى حظي أنا قبل ما موت ؟
شوقي : بتكون متلك متل عشرين مليون مواطن هههههههههه
سعد : هههههههههههههههه ........ يا سيدي شر البلية ما يضحك

ههههههههههههههههههههه عليي الطلاق من صاحبتي انو حلوه ههههههههههههههههههههههه

مشكوره على هل الموضوع .. جد حلو

زائر

إيهاب : أهلين بالحبيب
شهاب : أهلين عمي إيهابو ، كيفك ؟
إيهاب : و الله الحمدلله ، أنت شلونك و شلون تحضيرك للفحص
شهاب : يستر عرضك لا تجبلي سيرة الدراسة
إيهاب : ليش ؟ ما عم تدرس منيح ؟
شهاب : يا زلمة بقلك لا تجبلي سيرة الدراسة بتقوم بترد بتسألني عن الدراسة !!!
إيهاب : هههههههههههه طيب ، كيف شغلك
شهاب : ببوس إيدك لا تفتح سيرة الشغل ، أنا ما بصدق أطلع من الشغل و بلحش كل همومو ورايي
إيهاب : طيب أمرك خيو ، شو بدنا نسألك ؟
شهاب : ما بتفرق
إيهاب : طيب وين عم تروح و وين عم تجي
شهاب : كتير شايف عندي وقت روح و إجي فيه ؟
إيهاب : طيب كيف أوضاعك العاطفية حبيب
شهاب : لك شو ناوي تخليني ابكي انت اليوم ؟
إيهاب : إي احترنا يا أقرع من وين بدنا نسرحك
شهاب : أخي بتعمل معروف ؟
إيهاب : أمرني
شهاب : تركني بهمي
إيهاب : ههههههههههههههههههههههه طيب خيو أنا نازل عالقهوة إذا بدك لحقني
شهاب : قول ان شاء الله
إيهاب : سلام
شهاب : سلام
.
.
.
.
شهاب : يفضح حريشو كأبني بزيادة على هالأسئلة شيتو ..... حسيت حالي ميّت

زائر

نجلا : حبيبي
أنور: لك عيونو لحبيبك ، قلبو لحبيبك ، روحو لحبيبك ، أمريني
نجلا : يسلم ما ذكرت ، هلق أنت مو مرة قلتلي من زمان أنو أبوك محوّش قرشين مرتبين
أنور : هههههههههه إي
نجلا : ليش ما تبيع رقمك بالجمعية السكنية و مع القرشين منشتري بيت عالحارك ، أحسن ما ننطر الجمعية 4 سنين لخر
أنور : ليش ما دريتي؟
نجلا : لا
أنور : ليش أنا ما قلتلك ؟
نجلا : لك لأ ، شو ؟
أنور : بتتذكري الحادث اللي عملو الوالد قبل سنة و هو سايق السيارة عطريق المطار ؟
نجلا : إي ، ينذكر و ما ينعاد
أنور : مو كان معو بالسيارة 3 أشخاص ماتوا بوقتها الله يرحمن ؟
نجلا : إي ، و هو ألف الحمدلله نفد
أنور : إي ألف الحمدلله
نجلا : إي شو المغزى؟
وائل : إي دفع المصاري اللي كانو معو و اتدين فوقهن
نجلا : ليه؟؟؟ مشان يصلح السيارة ؟
أنور : لا لا ، السيارة مو مشكلة ، بس دفع دية لأهالي التلات أشخاص
نجلا : لعفا !! ، ليه يعني ؟
أنور : إي لأنو هو المسبب بالحادث
نجلا : معقول !!!!
أنور : متل ما عم قلك ، راحت تحويشة العمر و تدين فوقهن كمان
نجلا : معقول حبيبي في قانون هيك بالعالم ؟؟
أنور : هو مو معقول ، بس مو لتكون البلد بالأصل متل العالم ....

ماجد : لك وينك شريك و الله فانية ...ما حدى آخد معو شي و ما حدى بيستاهل ...
باسل : لك خييو انا معك بس أخي الشغلة مو بايدي يعني كل ما بدي زبط أموري بتطلعلي ها القصة متل الزنبوعة يعني شو بدي أعمل مو عرفان ..يعني و الله هيك الله خلقني ..!!
ماجد : خييو انت توكّل على الله و قدّم وراقك بركي السنة بتركز ...
باسل : أخي ما في مجال انا محطوط عندو على البلاك ليست زبطها بقا اذا بتزبط يعني ما في مجال بنوب
ماجد : أخي دبر حالك هون هون ... الا ما الها حلّة يعني يعني بالمشرمحي رشيت فلفل ؟؟؟؟
باسل : لك يا زلمة طقت روحي من ها القصة و ما ركزت لك صرت دافع من 1000 لل 100 ألف شو بعمل ؟؟؟
ماجد : خييو أحسن شي انسى ....
باسل : يا سيدي صرت مقتنع انو اللي مالو حظ لا يتعب ولا يشقى ....
اييييييييه سلاااااااااام
ماجد : موفّق
باسل : منين بدو يجي التوفيق شريك بيعين الله ...

مناف : لك انت ليش بتزدري العالم لك خييو ...

يوسف : أخي انا ما بزدري حدى بس انا بحب يكون اللي بقلبي على راس لساني يعني تعى لقلك شغلة أخي أنا بحب قلّو للأعور أعور بعينو و للأجدب أجدب بجدبنتو و للتنح تنح وقت ييبس راسو فهمت عليي ...

مناف : أخي أنا فهمان عليك بس أخي انت أحياناً بتزودها بلهجتك كتير ...

يوسف : أخي هيك الله خلقني ما بقدر جامل حدى
يعني وقت يكون في ببالي شغلة و بدي اشرحها لواحد مثلا بجي بحكي حكيي بيقوم بيفكرني
عم اتمسخر عليه شو بعملّو ... فهّمني ياها الله يرضى عليك ....

مناف : و الله يا ابو شريك حسب الواحد و طريقة فهمو للحكي ...

يوسف : وضّح أكتر ...

مناف : أخي القصة واضحة ... ما بدها تنين يحكو فيها إن شفت الأعمى طبّو مالك أكرم من ربو صح ولا لأ ؟؟؟؟؟؟؟؟؟؟

يوسف : صح .... و الله كلام ... و الله يا شريك أهل زمان ما تركو شي الا حكو عليه ....

مناف : اي هنن كانو يلعو كتير بس انت اعتبرلك بليرة و خلّصنا ...

ههههههههههههههههههههههههههههههههههههه
والله محتار اضحك لانو عايش ...ولا ابكي لانو الزل فوقنا وتحتنا...الله بيعين...

هههههههههههههههههههههههههههههه شي حلو تسلمي على هالروح المرحه كلك زوق وخفة دم